ഇന്ത്യന്‍ സ്വാതന്ത്ര്യസമരത്തെ മാറോട് ചേര്‍ത്തുവെച്ച കോഴിക്കോട് നഗരം മറ്റൊരു ചരിത്രസംഭവത്തിന് സാക്ഷ്യം വഹിക്കുന്നതിനുള്ള മുന്നൊരുക്കങ്ങള്‍ തുടങ്ങി.സഖാക്കള്‍ കൃഷ്ണപിള്ളയും ഇ എം എസും എ കെ ജിയും വളര്‍ത്തിയെടുത്ത കമ്മ്യൂണിസ്റ്റ്‌ പ്രസ്ഥാനത്തിന്റെ ഇരുപതാം പാര്‍ട്ടികോണ്‍ഗ്രസ്സിന്റെ സ്വാഗതസംഘം രൂപീകരണയോഗം ഇന്നലെ നടന്നു.ടാഗോര്‍ ഹാളിലും പുറത്തും തിങ്ങിനിറഞ്ഞ ആയിരക്കണക്കിന് പാര്‍ടിപ്രവര്‍ത്തകരുടെ സാന്നിധ്യത്തില്‍ കോഴിക്കോട് ആദ്യമായി നടക്കുന്ന സി പി ഐ എം പാര്‍ടികോണ്‍ഗ്രസ് വിജയപ്പിക്കുന്നതിനു 5001 അംഗ സ്വാഗതസംഘം രൂപീകരിച്ചു.പാര്‍ട്ടി സംസ്ഥാന സെക്രട്ടറി പിണറായി വിജയന്‍ ചെയര്‍മാനും, പാര്‍ട്ടി ജില്ലാ സെക്രട്ടറി ടി പി രാമകൃഷ്ണന്‍ ജനറല്‍ സെക്രട്ടറിയുമായ സ്വാഗതസംഘത്തിന്റെ ഖജാന്‍ജി എളമരം കരീമാണ്.പി ബി മെമ്പര്‍ കോടിയേരി ബാലകൃഷ്ണന്‍ അധ്യക്ഷത വഹിച്ച സ്വാഗതസംഘം രൂപീകരണയോഗം പിണറായി വിജയന്‍ ഉദ്ഘാടനം ചെയ്തു.ടി പി രാമകൃഷ്ണന്‍ സ്വാഗതവും പി സതീദേവി നന്ദിയും പറഞ്ഞു.എളമരം കരീം പരിപാടികളുടെ രൂപരേഖ അവതരിപ്പിച്ചു.2012 ഏപ്രില്‍ 4 മുതല്‍ 9 വരെ നടക്കുന്ന പാര്‍ട്ടികോണ്‍ഗ്രസ്സിന്റെ ഭാഗമായി വൈവിധ്യമാര്‍ന്ന അനുബന്ധ പരിപാടികളും നടത്തപ്പെടും.സെമിനാറുകള്‍,പ്രദര്‍ശനങ്ങള്‍,കുടുംബസംഗമങ്ങള്‍,കലാ-കായിക മത്സരങ്ങള്‍ എന്നിവയും ഉണ്ടാവും.സമാപന ദിവസമായ ഏപ്രില്‍ 9 നു കാല്‍ലക്ഷം ചുവപ്പ് വളണ്ടിയര്‍മാരുടെ പരേഡും,ചരിത്രമുറങ്ങുന്ന കോഴിക്കോട് കടപ്പുറത്ത് ലക്ഷങ്ങള്‍ പങ്കെടുക്കുന്ന ബഹുജനറാലിയും ആസൂത്രണം ചെയ്തിട്ടുണ്ട്.ജില്ലയിയിലെ പാര്‍ട്ടി പ്രവര്‍ത്തകര്‍ ഒന്നടങ്കം പാര്‍ട്ടികോണ്‍ഗ്രസ് ചരിത്രസംഭാവമാക്കുന്നതിനുള്ള പ്രവര്‍ത്തനങ്ങള്‍ ഇതിനകം തുടങ്ങിക്കഴിഞ്ഞു.
